قصيدة كف وقفا
الكف ينزل ع القفا
يلزق سنيين
تحية جنابك من فصيلة مخبرين
الأوضه ضلمه…. وفيها ناس مربوطين
ما تعرفشي ماتو… والا لسه منفوخين
ممكن تبحلق …. وانت معصوب العينيين
ممكن تشوف رمتك
والدود في إيد الجلادين
صحصح يا عزيزي
إنت في قلب الكمين
ظابط الأمن المكلكع يسألك
إنت ابن مين؟؟؟
إيه ال لمك ع العيال التلفانيين
الأساتذه أوالتلامذه
أو كفايه أو جماعة مسلمين
مالك انت وحرب غزه؟؟
مالك انت ومال جنيين؟؟؟
لو ناوي تنسي يفكرك
إنت مين
وهما مين
الحكومه والوزاره
واللصوص المعصومين
انت الـمُدان وانت المدين
انت ال قاعد
ع الخازوق من سنيين
انت ال مسنود ع الكلام
والكلام من غير إيدين
الكف ينزل عال قفا
يعمل طنيين
نشوف نجوم السما
والنجمه تظهر نجمتين
يسألونا بعدها
لسه برضو مصممين؟؟
لسه عرب؟؟
لسه برضو مسلمين؟؟
الحكايه إن إحنا دايما مظلومين
والظلم ماسك في الصهاينه
عاشق ومعشوق ملضومين
والسجانيين الجلادين
في بلدنا مندوبين
عن عدو الشعب
عن شارون عن كوهين
لكل واحد في بلدنا قفا
والا حد فينا لوه إيدين
يا بلدنا فين عددنا
واحنا ليه متبحترين
مين وعدنا بالحياه
مين جاوبنا بالأنيين
مين فينا من هذا البلد
ومين لسان الكدابين
مين ال طول العمر ساكت
مين ملهمض بلسانيين
مين ال سلم للمعلم
والمعلم موش أمين
إخوان عصابه بالرضاعه
في بلدنا من سنيين
مفضوحين عند الغلابه
وحدا الحكومه معروفين
والمصيبه انو مافيش
بيان بنوع المسروقات
أو بلاغ م المسروقين
والعجيب إن القضاه
في بلدنا مشغولين
في محاكمة جحش جاع
واكل قوالح خبازين
واحنا من كُتر الفكاهه
في الجنازه مسخسخين
هو احنا لازم يعني نصرخ
ونقول يا دنيا مسروقين
ويحصل ايه لو حتي نصرخ
دول عصابه ومجرمين
أحمد خفاجي
[b][center]